പെർത്ത്: വെസ്റ്റേൺ ഓസ്ട്രേലിയയിലെ ഫ്രീമാന്റിലേക്കുള്ള ഗതാഗതക്കുരുക്കിന് ആശ്വാസമാകുന്ന പുതിയ Fremantle Traffic Bridge നിശ്ചയിച്ചതിനേക്കാൾ മാസങ്ങൾ മുമ്പേ ഗതാഗതത്തിനായി തുറക്കുമെന്ന് സംസ്ഥാന സർക്കാർ അറിയിച്ചു.
പാലത്തിന്റെ നിർമ്മാണ പ്രവർത്തനങ്ങൾ പ്രതീക്ഷിച്ചതിനേക്കാൾ വേഗത്തിൽ പുരോഗമിച്ചതോടെയാണ് നേരത്തേ തുറക്കാനുള്ള തീരുമാനം. ഇതോടെ ഫ്രീമാന്റിൽ ഏറെക്കാലമായി അനുഭവപ്പെടുന്ന ഗതാഗത പ്രശ്നങ്ങൾക്ക് വലിയ ആശ്വാസമാകുമെന്നാണ് പ്രതീക്ഷ.
അതേസമയം, പദ്ധതിയുടെ ചെലവ് ആദ്യം കണക്കാക്കിയതിനെക്കാൾ ഉയർന്നിട്ടുണ്ട്. കൂടുതൽ ചെലവ് വന്നിട്ടും പാലം നേരത്തെ പൂർത്തിയാക്കാൻ കഴിഞ്ഞത് പദ്ധതിയുടെ പ്രധാന നേട്ടമായാണ് സർക്കാർ ചൂണ്ടിക്കാട്ടുന്നത്.പുതിയ പാലം തുറക്കുന്നതോടെ ഫ്രീമാന്റിലൂടെയുള്ള വാഹന ഗതാഗതം സുഗമമാകുകയും യാത്രാ സമയം കുറയുകയും ചെയ്യുമെന്നാണ് പ്രതീക്ഷ. പാലം തുറക്കുന്ന ഔദ്യോഗിക തീയതി സംസ്ഥാന സർക്കാർ പ്രഖ്യാപിച്ചിട്ടുണ്ട്.പദ്ധതിയുടെ പുരോഗതി സംബന്ധിച്ച കൂടുതൽ വിവരങ്ങളും ഗതാഗത ക്രമീകരണങ്ങളും സർക്കാർ പിന്നീട് പുറത്തുവിടും.
2026 നവംബർ 1ന് പാലം ഔദ്യോഗികമായി തുറക്കുമെന്ന് സംസ്ഥാന-ഫെഡറൽ സർക്കാരുകൾ അറിയിച്ചു.പുതിയ പാലത്തിന്റെ ഉദ്ഘാടനദിനത്തിൽ പൊതുജനങ്ങൾക്ക് പാലത്തിലൂടെ നടക്കാനും സൗകര്യമൊരുക്കും. തുടർന്ന് അന്നേ ദിവസം വൈകുന്നേരം വാഹന ഗതാഗതത്തിനായി പാലം തുറക്കും.
പഴയ Fremantle Traffic Bridge 2026 ഫെബ്രുവരി 1നാണ് അടച്ചത്. പാലത്തിന്റെ അടച്ചിടൽ 12 മാസം വരെ നീളുമെന്നായിരുന്നു ആദ്യ കണക്ക്. പുതിയ പാലം 2027ന്റെ ആദ്യ പകുതിയിലായിരിക്കും തുറക്കുകയെന്നായിരുന്നു നേരത്തെ പ്രതീക്ഷിച്ചിരുന്നത്.
എന്നാൽ വേഗത്തിൽ നിർമ്മാണം പൂർത്തിയാക്കാൻ സ്വീകരിച്ച പുതിയ നിർമ്മാണ രീതികളും പദ്ധതിയുമായി ബന്ധപ്പെട്ട വിവിധ വിഭാഗങ്ങളുടെ ഏകോപനവും പാലം നേരത്തെ പൂർത്തിയാക്കാൻ സഹായിച്ചു.
പുതിയ പാലത്തിൽ ഓരോ ദിശയിലും രണ്ട് വാഹന ലെയിനുകൾ ഉണ്ടായിരിക്കും. കാൽനടയാത്രക്കാർക്കും സൈക്കിൾ യാത്രക്കാർക്കുമായി നിലവാരമുള്ളതും കൂടുതൽ വീതിയുള്ളതുമായ shared paths-ഉം ഒരുക്കിയിട്ടുണ്ട്.പാലം Swan River-ന് മുകളിലൂടെ ഫ്രീമാന്റിനെയും സമീപ പ്രദേശങ്ങളെയും കൂടുതൽ സുരക്ഷിതവും സുഗമവുമായി ബന്ധിപ്പിക്കുമെന്നാണ് അധികൃതരുടെ വിലയിരുത്തൽ. യാത്രാസമയം കുറയ്ക്കാനും ചരക്ക് ഗതാഗതം മെച്ചപ്പെടുത്താനും പുതിയ പാലം സഹായിക്കുമെന്നാണ് പ്രതീക്ഷ.
പുതിയ Fremantle Traffic Bridge ഓസ്ട്രേലിയയിലെ ആദ്യത്തെ extradosed bridge ആയിരിക്കും. cantilever സാങ്കേതികവിദ്യയും cable-support സംവിധാനവും സംയോജിപ്പിച്ചാണ് പാലം രൂപകൽപ്പന ചെയ്തിരിക്കുന്നത്.വേനൽക്കാലവും ക്രിസ്മസ് വ്യാപാരകാലവും ആരംഭിക്കുന്നതിന് മുമ്പ് പാലം തുറക്കുന്നത് ഫ്രീമാന്റിലെ പ്രാദേശിക വ്യാപാര സ്ഥാപനങ്ങൾക്കും വിനോദസഞ്ചാര മേഖലയ്ക്കും ഗുണകരമാകുമെന്നാണ് അധികൃതരുടെ പ്രതീക്ഷ.
