ഓറഞ്ച് (NSW): കേരളത്തിന്റെ തനിമയും സാംസ്കാരിക പൈതൃകവും ഓസ്‌ട്രേലിയൻ മണ്ണിൽ അവതരിപ്പിക്കുന്ന കേരളീയം 2026-ന് വിശിഷ്ടാതിഥിയായി കേരളത്തിന്റെ തൊഴിൽ, വനിതാ-ശിശു വികസന വകുപ്പ് മന്ത്രി ബിന്ദു കൃഷ്ണ പങ്കെടുക്കും. നേരത്തെ വിശിഷ്ടാതിഥിയായി നിശ്ചയിച്ചിരുന്ന ടൂറിസം, സാംസ്കാരിക വകുപ്പ് മന്ത്രി പി. സി. വിഷ്ണുനാഥിന് ഔദ്യോഗിക തിരക്കുകൾ മൂലം പരിപാടിയിൽ പങ്കെടുക്കാൻ കഴിയില്ലെന്ന് സംഘാടകർ അറിയിച്ചു. അദ്ദേഹത്തിന് പകരമായി കേരള മുഖ്യമന്ത്രിയുടെ ഓഫീസ് ബിന്ദു കൃഷ്ണയെ വിശിഷ്ടാതിഥിയായി നാമനിർദേശം ചെയ്യുകയായിരുന്നു.
ഓറഞ്ചിലെ ഓറഞ്ച് സിവിക് തിയേറ്ററിൽ 2026 നവംബർ 16 തിങ്കളാഴ്ച വൈകിട്ട് 4.30-നാണ് പരിപാടി നടക്കുന്നത്. പ്രവേശനം സൗജന്യമാണ്. കേരളത്തിന്റെ കലയും സാഹിത്യവും സംസ്കാരവും സൗഹൃദവും ഒത്തുചേരുന്ന ബൃഹത്തായ സാംസ്കാരിക സംഗമമായാണ് കേരളീയം 2026 സംഘടിപ്പിക്കുന്നത്.
കേരളത്തിന്റെ പാരമ്പര്യ കലാരൂപങ്ങൾ, നൃത്തം, സംഗീതം, നാടകം തുടങ്ങിയ വൈവിധ്യമാർന്ന കലാപരിപാടികൾക്ക് പുറമെ വിവിധ രാജ്യങ്ങളിലെ സാംസ്കാരിക കൂട്ടായ്മകളുടെ കലാപ്രകടനങ്ങളും വേദിയിലെത്തും. മലയാളി കലാകാരന്മാർക്കൊപ്പം മറ്റ് രാജ്യങ്ങളിൽ നിന്നുള്ള കലാകാരന്മാരും വിവിധ സാംസ്കാരിക സമൂഹങ്ങളും ഒരേ വേദിയിൽ അണിനിരക്കുമെന്നത് പരിപാടിയുടെ പ്രധാന ആകർഷണമാണ്.
സാഹിത്യവും വായനയും പുസ്തകങ്ങളും പ്രോത്സാഹിപ്പിക്കുന്നതിനൊപ്പം ബിസിനസ് എക്സലൻസ് പുരസ്കാരങ്ങൾ, മലയാളിമങ്ക മത്സരം, വിദ്യാർഥികൾക്കായുള്ള പ്രത്യേക പരിപാടികൾ തുടങ്ങി നിരവധി ആകർഷകമായ ഇനങ്ങളും ഒരുക്കിയിട്ടുണ്ട്.
കേരളത്തിന്റെ സാംസ്കാരിക പൈതൃകത്തെ ഓസ്‌ട്രേലിയയിലെ ബഹുസാംസ്കാരിക സമൂഹവുമായി ബന്ധിപ്പിക്കുകയും വിവിധ ഭാഷാ-സാംസ്കാരിക വിഭാഗങ്ങൾക്കിടയിൽ സൗഹൃദവും ഐക്യവും വളർത്തുകയും ചെയ്യുക എന്നതാണ് പരിപാടിയുടെ ലക്ഷ്യം. മലയാളി സമൂഹത്തോടൊപ്പം മറ്റ് ഭാഷാ-സാംസ്കാരിക സമൂഹങ്ങളുടെയും പങ്കാളിത്തം ഉറപ്പാക്കുന്ന രീതിയിലാണ് ആഘോഷം ക്രമീകരിച്ചിരിക്കുന്നത്.
കേരളനാട് വായനശാല മൾട്ടികൾച്ചറൽ സെന്ററിന്റെ നേതൃത്വത്തിലാണ് കേരളീയം 2026 സംഘടിപ്പിക്കുന്നത്. സിഡ്നി ഉൾപ്പെടെ ഓസ്‌ട്രേലിയയുടെ വിവിധ ഭാഗങ്ങളിലുള്ള മലയാളികളെയും മറ്റ് സാംസ്കാരിക സമൂഹങ്ങളെയും കുടുംബസമേതം പരിപാടിയിലേക്ക് സംഘാടകർ ക്ഷണിച്ചു.
വേദി: ഓറഞ്ച് സിവിക് തിയേറ്റർ, ഓറഞ്ച്, NSW
തീയതി: 2026 നവംബർ 16, തിങ്കളാഴ്ച
സമയം: വൈകിട്ട് 4.30
പ്രവേശനം: സൗജന്യം
