ഗസ്സയില് സഹായവിതരണത്തിനെത്തിയ സന്നദ്ധ സംഘടനയുടെ ഏഴു പേരെ കൊലപ്പെടുത്തിയ ഇസ്രായേല് നടപടിക്കെതിരെ ലോകവ്യാപക പ്രതിഷേധം.
പട്ടിണി കൊണ്ടു വലയുന്ന ഫലസ്തീനില് ഭക്ഷണം വിതരണം ചെയ്യാനെത്തിയ സന്നദ്ധ സംഘടനയായ ‘വേള്ഡ് സെൻട്രല് കിച്ചണി’ന്റെ ഏഴു പ്രവർത്തകരെയാണ് ഇസ്രായേല് ബോംബിട്ടുകൊന്നത്. ഇതില് മൂന്ന് പേർ ബ്രിട്ടീഷ് പൗരൻമാരാണ്. അമേരിക്ക, ആസ്ത്രേലിയ, പോളണ്ട് എന്നീ രാജ്യങ്ങളില് നിന്നുള്ളവരാണ് മറ്റുള്ളവർ. വാഹന ഡ്രൈവറായ ഫലസ്തീനിയും കൊല്ലപ്പെട്ടവരില് ഉള്പ്പെടും. അതെ സമയം ഗസ്സയില് സന്നദ്ധപ്രവർത്തനം നിർത്തി വേള്ഡ് സെൻട്രല് കിച്ചണ്.
സെൻട്രല് ഗസ്സയിലെ ദേല് അല് ബലാഹിലാണ് ഇസ്രായേല് ക്രൂരത. വെയർഹൗസില്നിന്ന് ഭക്ഷണവുമായി ഗസ്സയിലേക്ക് നീങ്ങിയ വാഹനത്തിനു മുകളിലാണ് ഇസ്രായേല് ബോംബ് വർഷിച്ചത്. ഡബ്ല്യു.സി.കെ എംബ്ലം പതിച്ച രണ്ടു കാറുകളിലായി നീങ്ങിയ സംഘത്തിനുനേരെയായിരുന്നു ബോംബുവർഷം.
വാർത്ത ഞെട്ടിക്കുന്നതാണെന്നും നിഷ്പക്ഷ അന്വേഷണം ആവശ്യമെന്നും അമേരിക്കക്കൊപ്പം ബ്രിട്ടനും ആവശ്യപ്പെട്ടു. ദു:ഖകരമായ സംഭവമാണുണ്ടായതെന്ന് ഇസ്രായേല് പ്രധാനമന്ത്രി നെതന്യാഹു പ്രതികരിച്ചു. ഇതേക്കുറിച്ച് അന്വേഷണം നടത്തുമെന്ന് പ്രതിരോധ മന്ത്രി യോവ് ഗാലൻറ്. യു.എൻ സെക്രട്ടറി ജനറല് ആൻറണിയോ ഗുട്ടറസ് സംഭവത്തില് നടുക്കം പ്രകടിപ്പിച്ചു.
ചൈനയും റഷ്യയും ആക്രമണത്തെ അപലപിച്ചു. ആക്രമണത്തെ തുടർന്ന് മേഖലയിലെ പ്രവർത്തനം നിർത്തുന്നതായി വേള്ഡ് സെൻട്രല് കിച്ചണ് അധികൃതർ പ്രഖ്യാപിച്ചു.ഗസ്സയില് ഇതിനകം 196 സന്നദ്ധ പവർത്തകരെയാണ് ഇസ്രായേല് കൊന്നൊടുക്കിയത്. ആക്രമണ സാഹചര്യം കണക്കിലെടുത്ത് സൈപ്രസില് നിന്ന് ഗസ്സയിലെത്തിച്ച ഭക്ഷ്യവസ്തുക്കള് ഇറക്കാനാകാതെ കപ്പല് തിരിച്ചുപോയി. അവശേഷിച്ച 240 ടണ് സഹായവുമായി കപ്പല് തിരിച്ചുവിടാൻ തീരുമാനിക്കുകയായിരുന്നു.
സിറിയൻ തലസ്ഥാനമായ ഡമാസ്കസില് ഇറാൻ കോണ്സുലേറ്റിന് നേരെയുണ്ടായ ഇസ്രായേല് മിസൈല് ആക്രമണത്തിന് തിരിച്ചടി നല്കുമെന്ന് ഇറാൻ പരമോന്നത നേതാവ് ആയത്തുല്ല അലി ഖാംനഈ. ഉന്നത സൈനിക ഉദ്യോഗസ്ഥർ ഉള്പ്പെടെ നിരവധി പേർ ആക്രമണത്തില് കൊല്ലപ്പെട്ടിരുന്നു. ഇസ്രായേല് ആക്രമണത്തെ കുറിച്ച് തങ്ങള്ക്ക് മുൻകൂട്ടി വിവരം ലഭിച്ചിരുന്നില്ലെന്ന് പെൻറഗണ് പ്രതികരിച്ചു. യുദ്ധവ്യാപനത്തിന് ആക്കം കൂട്ടുന്നതാണ് ഇത്തരം നീക്കങ്ങളെന്ന് യു.എൻ സെക്രട്ടറി ജനറല് പ്രതികരിച്ചു. തെല് അവീവിലും ജറൂസലമിലും നെതന്യാഹുവിരുദ്ധ മുദ്രാവാക്യങ്ങളുയർത്തി ആയിരങ്ങള് ഇന്നലെയും പ്രതിഷേധിച്ചു.
