മെൽബൺ: ഓസ്ട്രേലിയയിലെ മെൽബൺ മലയാളി സമൂഹത്തിന്റെ പ്രിയങ്കരനായ ബേർട്ടി ചാക്കോ (74) നിര്യാതനായി. അർബുദത്തോടുള്ള ദീർഘകാല പോരാട്ടത്തിനൊടുവിലാണ് അന്ത്യം.
ഓസ്ട്രേലിയയിലെ ആദ്യകാല പ്രവാസികളിൽ ഒരാളായിരുന്ന ബേർട്ടി ചാക്കോ പൊതുമേഖലയിലെ കലാ-സാംസ്കാരിക രംഗങ്ങളിൽ സജീവ സാന്നിധ്യമായിരുന്നു. മലയാളി അസോസിയേഷൻ ഓഫ് വിക്ടോറിയ (MAV)യുടെ സാരഥിയായും മെൽബണിലെ സീറോ മലബാർ ചർച്ച് നിർമ്മാണത്തിനായി മുൻകൈ എടുത്ത വ്യക്തിയുമായും അദ്ദേഹം സമൂഹത്തിൽ ശ്രദ്ധേയനായിരുന്നു.
ഇടുക്കി ജില്ലയിലെ തൊടുപുഴ സ്വദേശിയായിരുന്ന അദ്ദേഹം പിന്നീട് തിരുവനന്തപുരം താമസസ്ഥലമാക്കിയിരുന്നു. പ്രവാസ ലോകത്ത് പ്രായഭേദമന്യേ വലിയൊരു സുഹൃദ് വലയവും അദ്ദേഹത്തിനുണ്ടായിരുന്നു. എല്ലാവരോടും സ്നേഹത്തോടെയും പുഞ്ചിരിയോടെയും പെരുമാറിയിരുന്ന അദ്ദേഹത്തിന്റെ വേർപാട് മെൽബൺ മലയാളി സമൂഹത്തിന് വലിയ നഷ്ടമായാണ് വിലയിരുത്തപ്പെടുന്നത്.
സംസ്കാര ശുശ്രൂഷകൾ 2026 മാർച്ച് 18 ബുധനാഴ്ച മെൽബണിലെ ഡാൻഡിനോങിലുള്ള സെന്റ് തോമസ് സീറോ മലബാർ ചർച്ചിൽ നടക്കും. ഉച്ചയ്ക്ക് 12 മുതൽ 1.30 വരെ അന്ത്യോപചാരം അർപ്പിക്കാനുള്ള അവസരം ഉണ്ടായിരിക്കും. തുടർന്ന് വിശുദ്ധ കുർബാനയും സംസ്കാര ശുശ്രൂഷകളും നടക്കും. ശേഷം ഡാൻഡിനോങ് സൗത്തിലെ ബുനറോങ് മെമ്മോറിയൽ പാർക്കിൽ സംസ്കാരം നടത്തും.
ബേർട്ടി ചാക്കോയുടെ നിര്യാണത്തിൽ കുടുംബാംഗങ്ങളുടെയും സുഹൃത്തുക്കളുടെയും സമൂഹത്തിന്റെയും ആഴത്തിലുള്ള ദുഃഖം രേഖപ്പെടുത്തി. ആത്മാവിന് നിത്യശാന്തി നേരുന്നു.
