മാൾട്ട: രാജ്യത്തെ തൊഴിൽ മേഖലയിൽ വർധന തുടരുന്നു. 2026ലെ രണ്ടാം പാദത്തിൽ മാൾട്ടയിൽ ജോലി ചെയ്യുന്നവരുടെ എണ്ണം 3,39,935 ആയി ഉയർന്നു. കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 3.4 ശതമാനമാണ് വർധന, ഏകദേശം 11,200 പേർ അധികമായി തൊഴിൽ രംഗത്തേക്ക് എത്തിയതായി നാഷണൽ സ്റ്റാറ്റിസ്റ്റിക്സ് ഓഫീസ് (NSO) പുറത്തുവിട്ട കണക്കുകൾ വ്യക്തമാക്കുന്നു.
അതേസമയം, ജീവനക്കാരുടെ ശരാശരി മാസ അടിസ്ഥാന ശമ്പളം €2,282 ആയി ഉയർന്നു. കഴിഞ്ഞ വർഷം ഇത് €2,148 ആയിരുന്നു. ഇതോടെ ശരാശരി ശമ്പളത്തിൽ 6.2 ശതമാനം വർധന രേഖപ്പെടുത്തി. ഓവർടൈം, അലവൻസുകൾ, ബോണസ് എന്നിവ ഈ കണക്കിൽ ഉൾപ്പെടുത്തിയിട്ടില്ല. ശമ്പള കണക്കുകൾ നിലവിൽ താൽക്കാലികമാണെന്നും NSO വ്യക്തമാക്കി.പുരുഷന്മാരുടെ ശരാശരി അടിസ്ഥാന ശമ്പളം €2,308 ആയപ്പോൾ സ്ത്രീകളുടേത് €2,247 ആണ്. തൊഴിൽ മേഖല അനുസരിച്ച് ശമ്പളത്തിൽ വലിയ വ്യത്യാസവും റിപ്പോർട്ട് ചെയ്തിട്ടുണ്ട്. മാനേജർമാർക്ക് ശരാശരി €3,657 ലഭിക്കുമ്പോൾ അടിസ്ഥാന ജോലികളിലുള്ളവരുടെ ശരാശരി ശമ്പളം €1,412 ആണ്.മേഖലകളിൽ ഏറ്റവും ഉയർന്ന ശരാശരി ശമ്പളം രേഖപ്പെടുത്തിയത് ഫിനാൻസ്, ഇൻഷുറൻസ് മേഖലയിൽ — €3,021 ആണ്.
അതേസമയം, മാൾട്ടയിലെ തൊഴിലില്ലായ്മ നിരക്ക് 3.3 ശതമാനമായി ഉയർന്നു. കഴിഞ്ഞ വർഷം ഇതേ കാലയളവിൽ ഇത് 2.8 ശതമാനമായിരുന്നു. ഏകദേശം 11,431 പേർ തൊഴിലില്ലാത്തവരായി കണക്കാക്കപ്പെടുന്നു.
15 മുതൽ 64 വയസ്സ് വരെയുള്ളവരുടെ തൊഴിൽ പങ്കാളിത്ത നിരക്ക് 80.1 ശതമാനമായി ഉയർന്നു. പുരുഷന്മാരിൽ ഇത് 85.1 ശതമാനവും സ്ത്രീകളിൽ 73.9 ശതമാനവുമാണ്.തൊഴിൽ വർധനയുടെ ഭൂരിഭാഗവും ഫുൾടൈം ജോലികളിലാണ് ഉണ്ടായത്. രണ്ടാം പാദത്തിൽ ഫുൾടൈം ജോലി ചെയ്യുന്നവരുടെ എണ്ണം 2,99,994 ആയി.
