ഫ്ലോറിയാന: മാൾട്ടയിലെ ചരിത്രപ്രസിദ്ധമായ ഫ്ലോറിയാനയിൽ ജനസംഖ്യാ പ്രതിസന്ധി രൂക്ഷമാകുന്നു. രണ്ടാം ലോകമഹായുദ്ധത്തിനു ശേഷമുള്ള കാലയളവിൽ പ്രദേശത്തെ ജനസംഖ്യയിൽ ഏകദേശം മൂന്നിൽ രണ്ട് കുറവുണ്ടായതായി ഫ്ലോറിയാന ലോക്കൽ കൗൺസിൽ വ്യക്തമാക്കി. നിലവിൽ 1,700ഓളം പേർ മാത്രമാണ് ഇവിടെ സ്ഥിരതാമസക്കാരായുള്ളത്.
ജനസംഖ്യയിലെ ഇടിവിന്റെ ഗുരുതരാവസ്ഥ വ്യക്തമാക്കുന്നതാണ് “മാമോദീസകളേക്കാൾ കൂടുതൽ ശവസംസ്കാരങ്ങൾ നടക്കുന്നു” എന്ന ഫ്ലോറിയാന ലോക്കൽ കൗൺസിൽ വൈസ് മേയർ James Aaron Ellul-ന്റെ പ്രതികരണം. പ്രദേശത്തെ ശരാശരി താമസക്കാരന്റെ പ്രായം 60 വയസ്സിന് മുകളിലാണെന്നും അദ്ദേഹം ചൂണ്ടിക്കാട്ടി.
5,000ൽ നിന്ന് 1,700ലേക്ക്
ഒരു കാലത്ത് 5,000ത്തിലധികം ജനസംഖ്യയുണ്ടായിരുന്ന ഫ്ലോറിയാനയിലാണ് ഇപ്പോൾ 1,700ഓളം പേർ മാത്രമുള്ളത്. ജനസംഖ്യ കുറയുന്നതിനൊപ്പം പ്രദേശത്തെ താമസമേഖലയുടെ സ്വഭാവത്തിലും വലിയ മാറ്റം സംഭവിക്കുന്നതായി ലോക്കൽ കൗൺസിൽ പറയുന്നു. വീടുകളും മറ്റ് താമസസ്ഥലങ്ങളും ബൂട്ടിക് ഹോട്ടലുകൾ, ഹ്രസ്വകാല വാടക താമസസൗകര്യങ്ങൾ, വാണിജ്യ ആവശ്യങ്ങൾ എന്നിവയ്ക്കായി മാറ്റുന്നത് വർധിച്ചതാണ് പ്രധാന ആശങ്കകളിലൊന്ന്. നിക്ഷേപവും വികസനവും സ്വാഗതം ചെയ്യുമ്പോഴും അതിന്റെ പേരിൽ പ്രദേശത്തെ സ്ഥിരതാമസക്കാരെ നഷ്ടപ്പെടുത്താൻ പാടില്ലെന്നാണ് കൗൺസിലിന്റെ നിലപാട്.
യുവാക്കൾക്ക് വീട് വാങ്ങാൻ കഴിയാത്ത സ്ഥിതി
ഫ്ലോറിയാനയിലെ വസ്തുവിലകൾ ഉയർന്നതോടെ യുവ ദമ്പതികൾക്ക് ഇവിടെ വീടുകൾ സ്വന്തമാക്കുന്നത് കൂടുതൽ ബുദ്ധിമുട്ടായതായി കൗൺസിൽ ചൂണ്ടിക്കാട്ടുന്നു. ഇതിന്റെ ഫലമായി പല വീടുകളും ബിസിനസുകൾക്കും നിക്ഷേപ ആവശ്യങ്ങൾക്കുമായി വാങ്ങപ്പെടുന്നതായും അധികൃതർ പറയുന്നു.ഇതിന് പരിഹാരമായി ഫ്ലോറിയാനയിൽ വീട് വാങ്ങി കുടുംബം ആരംഭിക്കാൻ ആഗ്രഹിക്കുന്ന യുവാക്കളും ആദ്യമായി വീട് വാങ്ങുന്നവരും ഉൾപ്പെടെ ലക്ഷ്യമിട്ട് പ്രാദേശിക പദ്ധതികളും സാമ്പത്തിക പ്രോത്സാഹനങ്ങളും നടപ്പാക്കണമെന്നാണ് കൗൺസിലിന്റെ ആവശ്യം.
പ്രതിഷേധവുമായി ലോക്കൽ കൗൺസിൽ
ജനസംഖ്യാ പ്രതിസന്ധിയിൽ അടിയന്തര ഇടപെടൽ ആവശ്യപ്പെട്ട് ഫ്ലോറിയാന ലോക്കൽ കൗൺസിൽ പ്രതീകാത്മക പ്രതിഷേധവും നടത്തി. ഒരു ദിവസം കൗൺസിൽ ഓഫീസ് അടച്ചിട്ടാണ് അധികൃതർ പ്രതിഷേധിച്ചത്. അത്യാവശ്യവും അടിയന്തരവുമായ സേവനങ്ങൾ മാത്രമാണ് അന്ന് ലഭ്യമാക്കിയത്.
കഴിഞ്ഞ രണ്ട് വർഷമായി നയരേഖകൾ, വാർത്താസമ്മേളനങ്ങൾ, വിവിധ കൂടിക്കാഴ്ചകൾ എന്നിവയിലൂടെ പ്രശ്നം അധികാരികളുടെ ശ്രദ്ധയിൽപ്പെടുത്താൻ ശ്രമിച്ചിട്ടും ആവശ്യമായ നടപടികൾ ഉണ്ടായില്ലെന്നാണ് കൗൺസിലിന്റെ ആരോപണം.
“ഇത് സർക്കാരിനെതിരായ പ്രതിഷേധമല്ല; ഞങ്ങളുടെ ആശങ്കകൾ അധികാരികൾ കേൾക്കണമെന്ന ആവശ്യമാണ്,” എന്നാണ് വൈസ് മേയർ James Aaron Ellul വ്യക്തമാക്കിയത്.
ടൂറിസം വികസനമോ ജനവാസമോ?
ഫ്ലോറിയാനയുടെ പുനർവികസനം നടക്കുമ്പോൾ താമസക്കാരെ നിലനിർത്തുന്നതിനും ജനവാസ മേഖലകളെ സംരക്ഷിക്കുന്നതിനും കൂടുതൽ പ്രാധാന്യം നൽകണമെന്നാണ് ലോക്കൽ കൗൺസിലിന്റെ ആവശ്യം.പ്രാദേശിക പ്ലാനിലും ആസൂത്രണ നയങ്ങളിലും മാറ്റം വരുത്തുക, താമസ ആവശ്യത്തിനുള്ള വീടുകൾക്ക് കൂടുതൽ സംരക്ഷണം നൽകുക, ഒഴിഞ്ഞുകിടക്കുന്ന വീടുകൾ താമസത്തിനായി ഉപയോഗിക്കുക, ആദ്യമായി വീട് വാങ്ങുന്ന യുവാക്കൾക്ക് പ്രത്യേക ആനുകൂല്യങ്ങൾ നൽകുക തുടങ്ങിയ നിർദേശങ്ങളും കൗൺസിൽ മുന്നോട്ടുവച്ചിട്ടുണ്ട്.
ദേശീയ പ്രാധാന്യമുള്ള പ്രശ്നമെന്ന് പ്രതിപക്ഷവും
ഫ്ലോറിയാനയിലെ ജനസംഖ്യാ പ്രതിസന്ധി ഇനി അവഗണിക്കാനാകില്ലെന്ന് നാഷണലിസ്റ്റ് പാർട്ടിയും പ്രതികരിച്ചു. സർക്കാർ, പ്രതിപക്ഷം, ലോക്കൽ കൗൺസിൽ എന്നിവർ ഏകോപിതമായി അടിയന്തര നടപടികൾ സ്വീകരിക്കണമെന്ന് പാർട്ടി ആവശ്യപ്പെട്ടു.സാമ്പത്തിക വികസനവും പുനർവികസനവും ആവശ്യമാണ്. എന്നാൽ അതിന്റെ പേരിൽ ഫ്ലോറിയാനയിലെ സ്ഥിരതാമസക്കാരെ നഷ്ടപ്പെടുത്തരുതെന്നതാണ് പ്രധാന ആവശ്യം.
“ഫ്ലോറിയാന ഒരു ടൂറിസ്റ്റ് കേന്ദ്രം മാത്രമല്ല, ആളുകൾക്ക് ജീവിക്കാനും കുടുംബം വളർത്താനും കഴിയുന്ന ഒരു ജനവാസകേന്ദ്രമായി തുടരണം” എന്ന സന്ദേശമാണ് ലോക്കൽ കൗൺസിൽ മുന്നോട്ടുവയ്ക്കുന്നത്.
