കാൻബറ: ഓസ്ട്രേലിയൻ പൊതുഭരണ ചരിത്രത്തിലെ ഏറ്റവും നാണംകെട്ട അധ്യായമെന്ന് വിശേഷിപ്പിക്കപ്പെടുന്ന ‘റോബോഡെറ്റ്’ (Robodebt) പദ്ധതിയുടെ ഇരകളായ 1.25 ലക്ഷത്തിലധികം സാധാരണക്കാർക്ക് ഒടുവിൽ നീതി ലഭിക്കുന്നു. നിയമവിരുദ്ധമായ ഈ പദ്ധതിയിലൂടെ ജനങ്ങളിൽ നിന്ന് സർക്കാർ പിടിച്ചെടുത്ത കോടിക്കണക്കിന് രൂപ നഷ്ടപരിഹാരമായി തിരികെ നൽകാൻ കോടതി ഉത്തരവിട്ടു.
ഒരു കമ്പ്യൂട്ടർ അൽഗോരിതം ഉപയോഗിച്ച് ജനങ്ങളുടെ വരുമാനം കണക്കാക്കി, അവർ സർക്കാരിൽ നിന്ന് കൂടുതൽ ആനുകൂല്യങ്ങൾ കൈപ്പറ്റിയെന്ന് വ്യാജമായി ആരോപിച്ചായിരുന്നു റോബോഡെറ്റ് പദ്ധതി നടപ്പിലാക്കിയത്. യാതൊരുവിധ മനുഷ്യസഹായവുമില്ലാതെ പൂർണ്ണമായും ഓട്ടോമേറ്റഡ് സംവിധാനത്തിലൂടെയാണ് ഈ കടബാധ്യതകൾ ആളുകളുടെ മേൽ അടിച്ചേൽപ്പിച്ചത്. തുടർന്ന് പതിനായിരക്കണക്കിന് സാധാരണക്കാർക്ക് ഭീമമായ തുക തിരിച്ചടയ്ക്കണമെന്ന് കാണിച്ച് സർക്കാർ നോട്ടീസുകൾ അയക്കുകയായിരുന്നു.
പദ്ധതി പൂർണ്ണമായും പരാജയമാണെന്നും നിയമവിരുദ്ധമാണെന്നും വ്യക്തമായതോടെ ഓസ്ട്രേലിയൻ ഫെഡറൽ കോടതി സർക്കാരിനെതിരെ കടുത്ത നിലപാട് സ്വീകരിച്ചു. ഇരകളായ 124,000-ത്തിലധികം ആളുകൾക്ക് 1.2 ബില്യൺ ഓസ്ട്രേലിയൻ ഡോളർ (ഏകദേശം 750 മില്യൺ യു.എസ് ഡോളർ) തിരികെ നൽകാൻ സർക്കാർ ധാരണയായിട്ടുണ്ട്. ഇതിൽ തെറ്റായി ഈടാക്കിയ 746 മില്യൺ ഡോളർ നേരിട്ട് റീഫണ്ട് ചെയ്യുന്നതിനൊപ്പം നിയമനടപടികൾ നേരിട്ടവർക്കുള്ള നഷ്ടപരിഹാരവും ഉൾപ്പെടുന്നു.
ഈ ക്രൂരമായ പദ്ധതി മൂലം പലർക്കും കടുത്ത മാനസിക വിഷമങ്ങളും സാമ്പത്തിക പ്രതിസന്ധികളും നേരിടേണ്ടി വന്നിരുന്നു. ചിലർ ജീവനൊടുക്കാൻ പോലും ഈ കടബാധ്യത കാരണമായതായി റിപ്പോർട്ടുകൾ വന്നിരുന്നു. റോബോഡെറ്റ് പദ്ധതി വലിയൊരു ദുരന്തമായിരുന്നുവെന്നും ഓസ്ട്രേലിയൻ ജനതയോട് സർക്കാർ മാപ്പ് ചോദിക്കുന്നുവെന്നും പ്രധാനമന്ത്രി ആന്റണി ആൽബനീസ് മുൻപ് വ്യക്തമാക്കിയിരുന്നു. ഈ കോടതി വിധി സാധാരണക്കാരായ ജനങ്ങളുടെ വലിയൊരു പോരാട്ടത്തിന്റെ വിജയമായാണ് വിലയിരുത്തപ്പെടുന്നത്.
ഫെഡറൽ കോടതി ജസ്റ്റിസ് ജോനാഥൻ ബീച്ചാണ് പുതിയ ധനസഹായത്തിന് അനുമതി നൽകിയത്. കോടതിച്ചെലവുകളും മറ്റ് ഭരണച്ചെലവുകളും ഉൾപ്പെടെ ആകെ 548.5 മില്യൺ ഡോളറിന്റെ വലിയൊരു പാക്കേജിന്റെ ഭാഗമാണിത്. മുൻപ് പ്രഖ്യാപിച്ച 112 മില്യൺ ഡോളറിന്റെ കരാറിന് പുറമെയാണിത്. ഇതനുസരിച്ച് അർഹരായ ഇരകൾക്ക് ആറ് മാസത്തിനകം 1,000 ഡോളർ അല്ലെങ്കിൽ 1,750 ഡോളർ വീതം നിശ്ചിത നഷ്ടപരിഹാരം ലഭിക്കും. എന്നാൽ വ്യക്തിഗതമായി ക്ലെയിം മൂല്യനിർണ്ണയം നടത്തുന്നവർക്ക് തുക ലഭിക്കാൻ 18 മാസം വരെ സമയമെടുത്തേക്കാം. പൊതുഭരണ രംഗത്തെ വലിയൊരു തിരുത്തലായി ഈ കോടതി വിധി വിലയിരുത്തപ്പെടുന്നു
