ചെന്നൈ: നടൻ മന്സൂര് അലിഖാൻ തനിക്കെതിരെ നടത്തിയ മോശം പരാമർശത്തിൽ രൂക്ഷ പ്രതികരണവുമായി നടി തൃഷ രംഗത്ത് എത്തിയത് വലിയ വാര്ത്ത പ്രധാന്യമാണ് നേടിയത്. തനിക്കെതിരായുള്ള മൻസൂറിന്റെ വാക്കുകളെ ശക്തമായ രീതിയിൽ അപലപിക്കുന്നുവെന്നും നടൻ മനുഷ്യരാശിക്ക് തന്നെ അപമാനമാണെന്നും തൃഷ പറഞ്ഞത്. തൃഷ നായികയായ ലിയോയില് റേപ് സീൻ ഇല്ലായിരുന്നു എന്നും ഉറപ്പായും ഒരു ബെഡ് റൂം സീൻ കാണുമെന്ന് പ്രതീക്ഷിച്ചിരുന്നുവെന്നും അതിന് ആഗ്രഹമുണ്ടായിരുന്നു എന്നുമായിരുന്നു മൻസൂര് അലി ഖാൻ പറഞ്ഞിരുന്നത്. ഇതിനെതിരെ പ്രതികരിച്ച് തൃഷ തന്നെ രംഗത്ത് എത്തിയിരുന്നു. മൻസൂർ അലി ഖാൻ എന്നെക്കുറിച്ച് ക്രൂരവും വെറുപ്പുളവാക്കുന്നതുമായി സംസാരിച്ച ഒരു വീഡിയോ അടുത്തിടെ കാണാൻ ഇടയായി. ഞാൻ അതിൽ ശക്തമായി അപലപിക്കുകയാണ്. സ്ത്രീവിരുദ്ധനായ ഒരാളുടേതാണ് ആ പ്രസ്താവന. അയാള് നമ്മുടെ മനുഷ്യരാശിക്ക് അപമാനമാണ് എന്നുമാണ് തൃഷ വ്യക്തമാക്കിയത്, മൻസൂര് അലി ഖാന് എതിരെ സംവിധായകൻ ലോകേഷ് കനകരാജും വിമര്ശനവുമായി എത്തിയിരുന്നു.പിന്നാലെ സിനിമ രംഗത്തെ പ്രമുഖര് തൃഷയെ പിന്തുണച്ച് രംഗത്ത് എത്തി.
ഇതിന് പിന്നാലെ തൃഷയ്ക്കെതിരായ പരാമര്ശത്തില് മാപ്പു പറയില്ലെന്നാണ് മന്സൂര് അലി ഖാന് ഇപ്പോള് പറയുന്നത്. ചെന്നൈയില് വിളിച്ചുചേര്ത്ത വാര്ത്ത സമ്മേളനത്തിലാണ് മന്സൂറിന്റെ പ്രസ്താവന. തന്നോട് മാപ്പ് പറയാന് ആവശ്യപ്പെട്ട തമിഴ് താര സംഘടനയെയും മന്സൂര് വിമര്ശിച്ചു. മാപ്പു പറയാൻ തന്നോട് ആവശ്യപ്പെട്ടത് വിശദീകരണം ചോദിക്കാതെയാണെന്ന് മന്സൂര് ആരോപിച്ചു. നാല് മണിക്കൂറിനുള്ളില് തനിക്കെതിരായ നോട്ടീസ് പിന്വലിക്കണമെന്നും മന്സൂര് ആവശ്യപ്പെട്ടു. ഇല്ലെങ്കില് താന് നിയമ നപടിയിലേക്ക് കടക്കുമെന്നും നടന് പറഞ്ഞു.
മാപ്പ് പറയേണ്ടുന്ന ഒരു തെറ്റും ഞാന് ചെയ്തിട്ടില്ല. നടികര് സംഘത്തിന്റെ നീക്കങ്ങള് ഹിമാലയന് മണ്ടത്തരമാണ്. തമിഴ്നാട്ടിലെ ജനങ്ങള് എനിക്കൊപ്പമാണ്. സിനിമയിലെ ബലാത്സംഗം യഥാർത്ഥമാണോ എന്നും മന്സൂര് ചോദിക്കുന്നു. സിനിമയില് കൊലകള് കാണിക്കുന്നു ആരെങ്കിലും മരിക്കുന്നുണ്ടോ എന്നും മന്സൂര് പത്ര സമ്മേളനത്തില് ചോദിച്ചു. നേരത്തെ നടി ഖുശ്ബു സുന്ദർ, സംവിധായകൻ ലോകേഷ് കനകരാജ്, കാർത്തിക് സുബ്ബരാജ്, ഗായിക ചിന്മയി ശ്രീപദ എന്നിവരുൾപ്പെടെ തമിഴ്നാട്ടിലെ നിരവധി സെലിബ്രിറ്റികൾ പിന്നാലെ മന്സൂറിനെ വിമര്ശിച്ച് രംഗത്ത് എത്തിയിരുന്നു. തുടര്ന്ന് തമിഴ് താരങ്ങളുടെ സംഘടന നടികര് സംഘം മന്സൂര് അലി ഖാനോട് മാപ്പ് പറയാന് ആവശ്യപ്പെട്ട് നോട്ടീസ് നല്കിയിരുന്നു. എന്നാല് നേരത്തെ സോഷ്യല് മീഡിയയില് ഇട്ട പോസ്റ്റില് നടന് തന്റെ പ്രസ്താവനയെ പ്രതിരോധിച്ച് രംഗത്ത് എത്തിയിരുന്നു.
