മെൽബൺ: ഡാൻഡനോങ് നോർത്ത് സ്വദേശിയായ 75 വയസ്സുകാരൻ ശാന്തശിവത്തെ (Santhasivam) കണ്ടെത്തുന്നതിനായി പോലീസ് പൊതുജനങ്ങളുടെ സഹായം അഭ്യർഥിച്ചു. അദ്ദേഹത്തെ ജൂൺ 2-ന് രാവിലെ 9 മണിയോടെ ഗ്ലാഡ്സ്റ്റോൺ റോഡിലെ വസതിയിൽ നിന്ന് പുറത്തിറങ്ങുന്നതായി അവസാനമായി കണ്ടതായി പോലീസ് അറിയിച്ചു.
ഡിമെൻഷ്യ ബാധിതനായ ശാന്തശിവത്തിന് ഇംഗ്ലീഷ് ഭാഷ അറിയാത്തതിനാൽ അദ്ദേഹത്തിന്റെ സുരക്ഷയെക്കുറിച്ച് കുടുംബാംഗങ്ങളും പോലീസും ആശങ്ക പ്രകടിപ്പിച്ചിട്ടുണ്ട്. തമിഴ് ഭാഷയാണ് അദ്ദേഹം സംസാരിക്കുന്നത്.
അവസാനമായി കാണപ്പെട്ടപ്പോൾ കറുത്ത നിറത്തിലുള്ള പഫർ ജാക്കറ്റ്, കറുത്ത പാന്റ്, കറുത്ത ഷൂ എന്നിവ ധരിച്ചിരുന്നതായും കൈയിൽ ഒരു കുട ഉണ്ടായിരുന്നതായും പോലീസ് അറിയിച്ചു.
ഡാൻഡനോങിലെ ഹെമ്മിംഗ്സ് പാർക്ക്, കൂടാതെ കേസി, നാറെ വാറൻ, എൻഡവർ ഹിൽസ് പ്രദേശങ്ങൾ എന്നിവിടങ്ങളിൽ അദ്ദേഹം പതിവായി പോകാറുണ്ടെന്നാണ് വിവരം.
ശാന്തശിവത്തെക്കുറിച്ച് എന്തെങ്കിലും വിവരം ലഭിക്കുന്നവർ ഉടൻ ഡാൻഡനോങ് പോലീസ് സ്റ്റേഷനുമായി (03) 9767 7444 എന്ന നമ്പറിൽ ബന്ധപ്പെടണമെന്ന് പോലീസ് അഭ്യർഥിച്ചു.
