ഓസ്ട്രേലിയയിൽ കാണപ്പെടുന്ന ഒരു ചിലന്തിവർഗമാണ് മയിൽച്ചിലന്തി അഥവാ പീകോക്ക് സ്പൈഡർ. 113 സ്പീഷിസുകളിലുള്ള ചിലന്തികൾ ഈ വിഭാഗത്തിൽ ഉൾപ്പെട്ടിരിക്കുന്നു. 113 സ്പീഷീസുകളിൽ ഓരോന്നിനും വ്യത്യസ്തമായ ശരീരകലകളും ഘടനകളുമുണ്ട്.
ഇക്കൂട്ടത്തിൽ ഏറ്റവും പുതിയ ചിലന്തിയിനമായ മാരാറ്റസ് യാൻഷെപ്പിനെ പെർത്ത് നഗരത്തിനു വടക്കായി 2 വർഷം മുൻപ് കണ്ടെത്തിയിരുന്നു. എന്നാൽ ഈ ചിലന്തികൾ ഗുരുതരമായ വംശനാശഭീഷണിയാണ് ഇപ്പോൾ നേരിടുന്നത്. ഓസ്ട്രേലിയയിൽ ഇടയ്ക്കിടെ സംഭവിക്കുന്ന ബുഷ്ഫയർ കാട്ടുതീയും നഗരവികസനത്തിനായുള്ള സ്ഥലമേറ്റെടുക്കലുമെല്ലാം പീകോക്ക് സ്പൈഡറുകളുടെ നില പരുങ്ങലിലാക്കുന്നു.
ചെറിയ ചിലന്തികളായ മയിൽച്ചിലന്തികളുടെ വലിപ്പം 4 മുതൽ 5 വരെ മില്ലിമീറ്ററാണ്. ചെറിയ വലുപ്പവും പ്രത്യേക ശീലങ്ങളും ഇവയെപ്പറ്റിയുള്ള പഠനങ്ങൾക്ക് പ്രതിസന്ധി സൃഷ്ടിക്കുന്നു. എന്നാൽ ഭീഷണി നേരിടുന്ന ജീവിവർഗങ്ങളുടെ പട്ടികയിൽ ഓസ്ട്രേലിയ ഇവയെ ഉൾപ്പെടുത്താത്തതിനാൽ പ്രത്യേക സംരക്ഷണമൊന്നും ഇവയ്ക്കു ലഭിക്കുന്നില്ല.
ഇവയെ സംരക്ഷിത വിഭാഗത്തിൽ ഉൾപ്പെടുത്തണമെന്ന ആവശ്യം ശക്തമാണ്.
