മെൽബൺ: വേതനവും സേവന വ്യവസ്ഥകളും സംബന്ധിച്ച എൻ്റർപ്രൈസ് ബാർഗൈനിംഗ് ചർച്ചകൾ പരാജയപ്പെട്ടതിനെ തുടർന്ന് വിക്ടോറിയയിലെ പ്രമുഖ റീജിയണൽ ആശുപത്രികളിലെ ഡോക്ടർമാർ പണിമുടക്കി. ബാലററ്റ് ബേസ് ഹോസ്പിറ്റൽ, ബെൻഡിഗോ ഹെൽത്ത് എന്നീ രണ്ട് വലിയ റീജിയണൽ ആശുപത്രികളിലെ നൂറുകണക്കിന് ഡോക്ടർമാരാണ് നാല് മണിക്കൂർ ജോലി ബഹിഷ്കരിച്ചത്. കഴിഞ്ഞ 20 വർഷത്തിനിടെ വിക്ടോറിയയിൽ ഡോക്ടർമാർ നടത്തുന്ന ആദ്യ പണിമുടക്കാണിത്.
കടുത്ത ജോലിഭാരവും ക്ഷീണവും കാരണം ആരോഗ്യമേഖല കടുത്ത പ്രതിസന്ധിയിലാണെന്നും വേതനമില്ലാത്ത അധികജോലിയും ജീവനക്കാരുടെ മനോവീര്യം തകർത്തതുമാണ് സമരത്തിലേക്ക് നയിച്ചതെന്നും ഡോക്ടർമാർ വ്യക്തമാക്കി. ചർച്ചകൾ ഒരു വർഷം പിന്നിട്ടിട്ടും പൊതു ആശുപത്രികളിലെ ഡോക്ടർമാർക്ക് സർക്കാർ ഇതുവരെ വ്യക്തമായ എൻ്റർപ്രൈസ് ബാർഗൈനിംഗ് എഗ്രിമെന്റ് (ഇ.ബി.എ) വാഗ്ദാനം മുന്നോട്ട് വെച്ചിട്ടില്ലെന്ന് ഓസ്ട്രേലിയൻ മെഡിക്കൽ അസോസിയേഷൻ (എ.എം.എ) വിക്ടോറിയ ചൂണ്ടിക്കാട്ടി.
ഗ്രാമപ്രദേശങ്ങളിലെയും റീജിയണൽ മേഖലകളിലെയും ആശുപത്രികളിൽ ഡോക്ടർമാരെ ആകർഷിക്കുന്നതിനും നിലനിർത്തുന്നതിനും ഫലപ്രദമായ നടപടികൾ സ്വീകരിക്കണമെന്നാണ് സംഘടനയുടെ പ്രധാന ആവശ്യം. അടിയന്തര ചികിത്സ, പ്രസവ ശുശ്രൂഷ, സ്പെഷ്യലിസ്റ്റ് സേവനങ്ങൾ എന്നിവയ്ക്കായി റീജിയണൽ മേഖലയിലെ ജനങ്ങൾ പൂർണ്ണമായും ആശ്രയിക്കുന്ന ഈ ആശുപത്രികളിലെ കടുത്ത തൊഴിൽ സമ്മർദ്ദം ഡോക്ടർമാരുടെ കൊഴിഞ്ഞുപോക്കിന് ആക്കം കൂട്ടുകയാണ്.
പ്രശ്നങ്ങൾ പരിഹരിച്ചില്ലെങ്കിൽ വരുന്ന സെപ്റ്റംബർ 15-ന് സംസ്ഥാനവ്യാപകമായി 24 മണിക്കൂർ സമ്പൂർണ്ണ പണിമുടക്ക് നടത്തുമെന്നും ഡോക്ടർമാരുടെ സംഘടന മുന്നറിയിപ്പ് നൽകിയിട്ടുണ്ട്. സമരം ആശുപത്രികളുടെ പ്രവർത്തനത്തെ സാരമായി ബാധിച്ചതോടെ ആരോഗ്യ മേഖലയിലെ പ്രതിസന്ധി പരിഹരിക്കണമെന്ന ചർച്ചകൾ കൂടുതൽ ശക്തമായിരിക്കുകയാണ്.
