കേരളത്തിൽ നിന്ന് ഗൾഫ് രാജ്യങ്ങളിലേക്കും യൂറോപ്പിലേക്കും അമേരിക്കയിലേക്കും കാനഡയിലേക്കും മികച്ച ശമ്പളം തേടി പോകുന്ന നഴ്സുമാർക്ക് അവസരങ്ങളുടെ വാതിൽ തുറന്ന് ജപ്പാനും. ഗൾഫിലും അമേരിക്കയിലും യൂറോപ്പിലും വർഷങ്ങളോളം ജോലി ചെയ്യുന്നതുപോലെ തന്നെ ജപ്പാനിലും മലയാളികൾ ഉൾപ്പെടെയുള്ള ഇന്ത്യൻ നഴ്സുമാർക്ക് അവസരം ലഭിക്കും. ജപ്പാനിലെ ജനസംഖ്യയിൽ വലിയ പങ്കും പ്രായമായ ആളുകളാണ്. ഇത് കാരണം കെയർ വർക്കർ ക്ഷാമവും രാജ്യത്തുണ്ട്.
കെയർ വർക്കർ, നഴ്സുമാർ, മറ്റ് ആരോഗ്യപ്രവർത്തകർ എന്നിവരെ ആകർഷിക്കുന്നതിനായി ജപ്പാനിൽ സ്കിൽഡ് വർക്കർ (എസ്എസ്ഡബ്ല്യു) വീസ പ്രോഗ്രാം നടപ്പാക്കുന്നുണ്ട്. 2019ൽ ആരംഭിച്ച ഈ വീസ മലയാളികൾക്കും മികച്ച അവസരമാണ് നൽകുന്നത്. ജാപ്പനീസ് ഭാഷയിലെ മികവും തൊഴിൽ വൈദഗ്ധ്യവുമുള്ള വിദേശികളെ തൊഴിൽ ക്ഷാമം നേരിടുന്ന മേഖലകളിൽ നിയമിക്കുന്നതിനാണ് ഈ പദ്ധതി നടപ്പാക്കിയിരിക്കുന്നത്.
അപേക്ഷകർ ജാപ്പനീസ് ഭാഷാ പ്രാവീണ്യത്തിന്റെ അടിസ്ഥാന പരീക്ഷകൾ പാസ്സായിരിക്കണം. മാത്രമല്ല തൊഴിൽ നൈപുണ്യ വിലയിരുത്തലിൽ മികവ് തെളിയിക്കുകയും വേണം. 2024ൽ മേഘാലയയിൽ നിന്നുള്ള 27 നഴ്സുമാർ ജാപ്പനീസ് ഭാഷാ പരിശീലനം പൂർത്തിയാക്കി ജോലി നേടിയിരുന്നു. ഇന്ത്യക്കാരിൽ മിക്കവരും ആദ്യ ശ്രമത്തിൽ ജാപ്പനീസ് ഭാഷാ പ്രാവീണ്യ പരീക്ഷകൾ പാസാകുന്നു എന്നത് മലയാളികൾക്കും പ്രതീക്ഷ നൽകുന്നതാണ്.
കൈപിടിക്കാൻ ഇന്ത്യ
കെയർ വർക്കർ, നഴ്സുമാർ, മറ്റ് ആരോഗ്യപ്രവർത്തകർ എന്നിവർക്ക് ആവശ്യമായ പരിശീലനം നൽകി ജപ്പാനിൽ ജോലി നേടുന്നതിന് ഇന്ത്യൻ സർക്കാരും മുൻകൈയെടുക്കുന്നുണ്ട്. സംസ്ഥാന സർക്കാരുകൾ, ദേശീയ നൈപുണ്യ വികസന സ്ഥാപനങ്ങളുമായി സഹകരിച്ചാണ് ഇത്തരത്തിൽ പരിശീലനം നൽകുന്നത്. തൊഴിൽ, ഭാഷാ പരിശീലനങ്ങൾ, റിക്രൂട്ട്മെന്റ് അവസരങ്ങൾ എന്നിവയെല്ലാം നൽകുന്നതിന് സംസ്ഥാന സർക്കാരുകൾ, ദേശീയ നൈപുണ്യ വികസന സ്ഥാപനങ്ങളുമായി സഹകരിക്കുന്നു.
വർധിക്കുന്ന ‘ജപ്പാനീസ് പ്രിയം’
ജാപ്പനീസ് ഭാഷാ പഠനത്തോടുള്ള താൽപര്യം കഴിഞ്ഞ രണ്ട് ദശകങ്ങളായി ഇന്ത്യയിൽ വർധിക്കുന്നതായിട്ടാണ് കണക്കുകൾ. ആരോഗ്യമേഖലയ്ക്ക് പുറമെ ഫാക്ടറി ജോലികൾക്കും ജപ്പാനിൽ അവസരം ലഭിക്കാൻ സാധ്യതയുണ്ടെന്നത് യുവാക്കളെ ആകർഷിക്കുന്നുണ്ട്. ജാപ്പനീസ് ഭാഷാ പ്രാവീണ്യം മികച്ച തൊഴിലിന് സഹായിക്കുമെന്ന വിശ്വാസമാണ് ഇന്ത്യയിൽ നിന്നുള്ള തൊഴിൽ അന്വേഷകർക്കുള്ളത്. ‘ജപ്പാൻ സുരക്ഷിതമാണ്, ധാരാളം തൊഴിലവസരങ്ങൾ വാഗ്ദാനം ചെയ്യുന്നുണ്ട്’– ജപ്പാനിൽ ജോലി ചെയ്യുന്ന ഇന്ത്യൻ കെയർ വർക്കർ പറയുന്നു.
ആനുകൂല ഘടകങ്ങൾ
കുറഞ്ഞ ജനനനിരക്ക്, വർധിച്ചുവരുന്ന വൃദ്ധജനസംഖ്യ എന്നിവ ആരോഗ്യമേഖലയിൽ വൻ തൊഴിലവസരമാണ് സൃഷ്ടിക്കുന്നത്. ഇതിന് ആവശ്യമായ തൊഴിലാളികളെ കണ്ടെത്തുന്ന തരത്തിലാണ് നിലവിലെ ജപ്പാന്റെ തൊഴിൽ കുടിയേറ്റ നയം.
പ്രതികൂല ഘടകങ്ങൾ
എസ്എസ്ഡബ്ല്യു വീസ പ്രാഥമികമായി നിശ്ചിത കാലയളവിലേക്കുള്ള ലേബർ മൊബിലിറ്റി പ്രോഗ്രാമാണ്. അതായത്, സ്വയമേവ സ്ഥിരതാമസം ഈ വീസയിലെത്തുന്നവർക്ക് ലഭിക്കില്ല. ജപ്പാനിലെ പ്രഫഷനൽ നഴ്സിങ് ലൈസൻസിന് ഭാഷാ പ്രാവീണ്യവത്തിന് പുറമെ ജപ്പാനിലെ ദേശീയ നഴ്സിങ് പരീക്ഷ പാസാകുകയും വേണം. തുടർന്ന് ആവശ്യമായ മറ്റ് ലൈസൻസിങ്ങും നേടിയാൽ ദീർഘകാല ജോലിക്ക് സാധ്യതയുണ്ട്. പക്ഷേ അത് വ്യക്തിപരമായ മികവിനെ ആശ്രയിച്ചിരിക്കുമെന്നാണ് റിപ്പോർട്ടുകൾ.
