വിദ്യാർത്ഥികൾ ഹോംവർക്ക് ചെയ്യാൻ ചാറ്റ്ജിപിടി പോലുള്ള കൃത്രിമബുദ്ധി (AI) ടൂളുകൾ വ്യാപകമായി ഉപയോഗിക്കുന്നത് തടയാൻ, ‘ഹെഡ്ജ്ഹോഗ് എജ്യുക്കേഷൻ’ (Hedgehog Education) എന്ന പുതിയ പ്ലാറ്റ്ഫോമുമായി മാൾട്ടയിലെ ഫിസിക്സ് അധ്യാപകൻ മിഗ്വേൽ മിക്കാലെഫും സംഘവും രംഗത്തെത്തി. ചോദ്യങ്ങൾക്ക് നേരിട്ട് ഉത്തരം നൽകുന്നതിന് പകരം, കുട്ടികളെ ചിന്തിപ്പിച്ചു ഉത്തരം കണ്ടെത്താൻ പ്രേരിപ്പിക്കുന്ന സോക്രട്ടിക് രീതിയാണ് (Socratic method) ഈ പ്ലാറ്റ്ഫോം പിന്തുടരുന്നത്. 97 ശതമാനത്തിലധികം വിദ്യാർത്ഥികളും എഐ ഹോംവർക്കിനായി ഉപയോഗിക്കുന്നുണ്ടെന്ന് കണ്ടെത്തിയ പരീക്ഷണത്തിന്റെ അടിസ്ഥാനത്തിലാണ് ഈ സ്റ്റാർട്ടപ്പ് പ്ലാറ്റ്ഫോം വികസിപ്പിച്ചത്.
മാൾട്ടയിലെ ഫിസിക്സ് അധ്യാപകനായ മിഗ്വേൽ മിക്കാലെഫ് (Miguel Micallef), ഡാറ്റ ആൻഡ് എഐ കൺസൾട്ടന്റായ മൈക ഡിമെക് (Mikea Dimech), ബിസിനസ് ഡെവലപ്മെന്റ് ഡയറക്ടറായ നൈജൽ കരുവാന (Nigel Caruana) എന്നിവർ ചേർന്നാണ് 2025-ൽ ഈ എഡ്യൂടെക് (EdTech) സ്റ്റാർട്ടപ്പ് ആരംഭിച്ചത്. വിദ്യാർത്ഥികൾ ചിന്തിക്കാനുള്ള കഠിനാധ്വാനം ഒഴിവാക്കി ഹോംവർക്കുകൾ പൂർണ്ണമായും ചാറ്റ്ജിപിടിയെ ഏൽപ്പിക്കുന്നത് തടയുകയാണ് ഇവരുടെ ലക്ഷ്യം.ഈ പ്ലാറ്റ്ഫോം കുട്ടികൾക്ക് ചോദ്യങ്ങളുടെ നേരിട്ടുള്ള ഉത്തരങ്ങൾ നൽകില്ല. പകരം, ഒരു അധ്യാപകനെപ്പോലെ കുട്ടികളോട് തിരിച്ച് ചോദ്യങ്ങൾ ചോദിക്കുകയും, അവരെ ഘട്ടങ്ങളായി ചിന്തിപ്പിച്ചു കൊണ്ട് ശരിയായ ഉത്തരത്തിലേക്ക് എത്തിക്കുകയും ചെയ്യും. ഇതിലൂടെ കുട്ടികളുടെ പ്രോബ്ലം സോൾവിങ് കഴിവുകൾ മെച്ചപ്പെടുന്നു.
മാൾട്ടയിലെ സെന്റ് മാർട്ടിൻസ് (St Martin’s) സ്കൂളിലെ ഒമ്പതാം ക്ലാസ് ഫിസിക്സ് വിദ്യാർത്ഥികളിലാണ് ഈ പ്ലാറ്റ്ഫോം ആദ്യമായി വിജയകരമായി പരീക്ഷിച്ചത്. തുടക്കത്തിൽ അധ്യാപകർക്ക് ഇതിൽ സംശയങ്ങൾ ഉണ്ടായിരുന്നെങ്കിലും, കുട്ടികളുടെ പഠന പുരോഗതി കൃത്യമായി ട്രാക്ക് ചെയ്യാൻ സാധിച്ചതോടെ ഈ പ്ലാറ്റ്ഫോം കൂടുതൽ സ്കൂളുകളിലേക്ക് വ്യാപിപ്പിക്കാൻ തീരുമാനിച്ചു.
വിദ്യാർത്ഥികൾ എഐ സാങ്കേതികവിദ്യ പൂർണ്ണമായി ഒഴിവാക്കണമെന്നല്ല, മറിച്ച് തങ്ങളുടെ ചിന്താശേഷി ഇല്ലാതാക്കാത്ത രീതിയിൽ അതിനെ ഒരു സഹായിയായി മാത്രം ഉപയോഗിക്കണമെന്നാണ് ഈ സ്റ്റാർട്ടപ്പ് മുന്നോട്ട് വെയ്ക്കുന്ന ആശയം.
