ഓസ്ട്രേലിയയിൽ 16 വയസ്സിൽ താഴെയുള്ള കുട്ടികൾക്ക് ഏർപ്പെടുത്തിയ സോഷ്യൽ മീഡിയ നിരോധനം നിർമ്മിത ബുദ്ധി (AI) ചാറ്റ്ബോട്ടുകൾക്കും ബാധകമാക്കണമെന്ന ആവശ്യം ശക്തമാകുന്നു. കുട്ടികളുടെ ഡിജിറ്റൽ കൂട്ടാളികളായി മാറുന്ന ഇത്തരം ചാറ്റ്ബോട്ടുകൾ ഉപയോക്താക്കളെ അപകടകരമായ സാഹചര്യങ്ങളിലേക്ക് നയിക്കുമെന്ന ഭീതി നിലനിൽക്കുന്ന പശ്ചാത്തലത്തിൽ, സാങ്കേതികവിദ്യയെ കൂടുതൽ കർശനമായി നിയന്ത്രിക്കാൻ സർക്കാർ തയ്യാറാകണമെന്നാണ് ഉയർന്നുവരുന്ന പ്രധാന ആവശ്യം. അമേരിക്കയിൽ നടന്ന ചില കൂട്ടക്കൊലകൾക്ക് ഇത്തരം എഐ ചാറ്റ്ബോട്ടുകൾ സഹായകരമായിട്ടുണ്ടെന്ന ആരോപണങ്ങൾ ഈ ആശങ്കയ്ക്ക് ആക്കം കൂട്ടുന്നു.
യഥാർത്ഥ ജീവിതത്തിലെ സൗഹൃദങ്ങൾക്കും ബന്ധങ്ങൾക്കും പകരമായി കൂടുതൽ യുവാക്കൾ ഇപ്പോൾ എഐ സാങ്കേതികവിദ്യയെ ആശ്രയിക്കുന്നതായാണ് റിപ്പോർട്ടുകൾ. താൻ ഉപയോഗിക്കുന്ന എഐ ചാറ്റ്ബോട്ട് ഒരു മനുഷ്യനല്ലെന്ന് ബോധ്യമുണ്ടെങ്കിലും, അതിന് തന്നെ ആഴത്തിൽ മനസ്സിലാക്കാൻ സാധിക്കുമെന്നാണ് മിയ അനസ്താസിയ എന്ന ഉപയോക്താവ് പ്രതികരിച്ചത്. എന്നാൽ, ഇത്തരം ചാറ്റ്ബോട്ടുകൾ പലപ്പോഴും ഉപയോക്താവിന്റെ ചിന്തകളെ അതേപടി പ്രതിഫലിപ്പിക്കുന്ന ഒരു കണ്ണാടിയായി പ്രവർത്തിക്കുമെന്നതാണ് ഇതിന്റെ പ്രധാന അപകടമെന്ന് മെൽബൺ സർവകലാശാലയിലെ ‘സെന്റർ ഫോർ എഐ ആൻഡ് ഡിജിറ്റൽ എത്തിക്സ്’ കോ-ഡയറക്ടർ പ്രൊഫസർ ജീനി പേറ്റേഴ്സൺ ചൂണ്ടിക്കാട്ടുന്നു. ഇവ എപ്പോഴും ഉപയോക്താവിനോട് യോജിക്കുകയും അവരെ പ്രോത്സാഹിപ്പിക്കുകയും ചെയ്യുന്നതിലൂടെ സംഭാഷണങ്ങൾ കൂടുതൽ വന്യവും യാഥാർത്ഥ്യബോധമില്ലാത്തതുമായ തലങ്ങളിലേക്ക് നീങ്ങാൻ കാരണമാകുമെന്നും അവർ മുന്നറിയിപ്പ് നൽകുന്നു.
കഴിഞ്ഞ വർഷമാണ് 16 വയസ്സിന് താഴെയുള്ള കുട്ടികൾ സോഷ്യൽ മീഡിയ ഉപയോഗിക്കുന്നത് ഓസ്ട്രേലിയൻ സർക്കാർ നിയമം മൂലം നിരോധിച്ചത്. ഈ നിരോധനം എഐ ചാറ്റ്ബോട്ടുകളിലേക്ക് കൂടി വ്യാപിപ്പിക്കണമെന്ന ആവശ്യത്തിന് നേതൃത്വം നൽകുന്നത് സ്വതന്ത്ര എംപി കേറ്റ് ചേനിയാണ്. എഐ സാങ്കേതികവിദ്യ ഉയർത്തുന്ന വെല്ലുവിളികളെ മുൻകൂട്ടി കണ്ട് ഇപ്പോൾത്തന്നെ പ്രതിരോധ നടപടികൾ സ്വീകരിക്കണമെന്നും, അല്ലെങ്കിൽ 15 വർഷത്തിന് ശേഷം ഇതിന്റെ നാശനഷ്ടങ്ങൾ പരിഹരിക്കാൻ ഓടേണ്ടി വരുമെന്നും അവർ ഓർമ്മിപ്പിച്ചു. എഐ ചാറ്റ്ബോട്ടുകൾ കുട്ടികളെ വളരെ ഇരുണ്ട ചിന്തകളിലേക്ക് നയിക്കാൻ സാധ്യതയുണ്ടെന്ന് പ്രതിപക്ഷ കമ്മ്യൂണിക്കേഷൻസ് വക്താവ് സാറാ ഹെൻഡേഴ്സണും വ്യക്തമാക്കി.
