ഡബ്ലിൻ : അയർലൻഡിലെ നഴ്സുമാരുടെ ഏറ്റവും വലിയ ട്രേഡ് യൂണിയനായ ഐറിഷ് നഴ്സസ് ആൻഡ് മിഡ്വൈവ്സ് യൂണിയൻ (ഐഎൻഎംഒ) യുടെ ദേശീയ എക്സിക്യൂട്ടീവ് കൗണ്സിലിലേക്ക് നടന്ന തെരഞ്ഞെടുപ്പില് മൈഗ്രന്റ് നഴ്സസ് അയർലൻഡ് പിന്തുണച്ച നാല് ഇന്ത്യക്കാർ എക്സിക്യൂട്ടീവ് കൗണ്സിലിലേക്ക് തെരഞ്ഞെടുക്കപ്പെട്ടു.
സംഘടനയുടെ ദേശീയ കണ്വീനർ വർഗീസ് ജോയിയും മാറ്റർ പബ്ലിക് ഹോസ്പിറ്റല് പ്രതിനിധിയായ ട്രീസ്സ പി ദേവസ്സ്യയും മാനേജ്മെന്റ് സീറ്റുകളിലേക്കും സംഘടനയുടെ വാട്ടർഫോർഡ് പ്രതിനിധിയായ ശ്യാം കൃഷ്ണൻ ക്ലിനിക്കല് സീറ്റിലേക്കുമാണ് വിജയിച്ചത്. ഇതുകൂടാതെ മൈഗ്രന്റ് നഴ്സസ് അയർലൻഡ് പിന്തുണച്ച ജിബിൻ മറ്റത്തില് സോമനും ക്ലിനിക്കല് സീറ്റിലേക്ക് വിജയിച്ചു.
അയർലൻഡിലെ ഏകദേശം അമ്ബതിനായിരത്തോളം നഴ്സുമാർക്കിടയില് നടന്ന വാശിയേറിയ തെരഞ്ഞെടുപ്പിലാണ് സംഘടന പിന്തുണച്ചവർ വിജയിച്ചത്. രണ്ടു വർഷത്തേക്കാണ് എക്സിക്യൂട്ടീവ് അംഗങ്ങളുടെ കാലാവധി. INMOയുടെ എക്സിക്യൂട്ടീവ് കൗണ്സിലിലേക്ക് ആദ്യമായിട്ടാണ് ഇത്ര ഇന്ത്യക്കാർ തെരഞ്ഞെടുക്കപ്പെടുന്നത്. എക്സിക്യൂട്ടീവ് കൗണ്സിലിലാണ് സംഘടനയുടെ പോളിസികളും നിർണായക തീരുമാനങ്ങളും രൂപപ്പെടുന്നത്.
എക്സിക്യൂട്ടീവ് കൗണ്സിലിലേക്ക് പ്രതിനിധികള് വരുന്നതോടു കൂടി കൂടുതല് സഹകരണം ഫലപ്രദമാക്കാനും പ്രവാസികള്ക്കടക്കം എല്ലാ നഴ്സുമാർക്കും പ്രയോജനപ്രദമാകുന്ന നിലപാടുകള് എടുക്കാനും കഴിയുമെന്നുമാണ് പ്രതീക്ഷിക്കുന്നത് .
