തിരുവനന്തപുരം: ചാറ്റ്ജിപിടി ഉപയോഗിച്ച് സൃഷ്ടിക്കുന്ന എഐ കാരിക്കേച്ചര് ചിത്രങ്ങളാണ് ഇന്സ്റ്റഗ്രാമും ഫേസ്ബുക്കും വാട്സ്ആപ്പും എക്സും അടക്കമുള്ള സോഷ്യല് മീഡിയ പ്ലാറ്റ്ഫോമുകളിലെങ്ങും. ചാറ്റ്ജിപിടി ഉപയോഗിച്ച് സ്വന്തം ഫോട്ടോകൾ കാർട്ടൂൺ ശൈലിയിലുള്ള കാരിക്കേച്ചറുകളാക്കി മാറ്റുന്നതാണ് ഈ ട്രെന്ഡ്. ഉപയോക്താക്കളുടെ പഴയ സംഭാഷണങ്ങളും താൽപര്യങ്ങളും ഓർമ്മയിൽ സൂക്ഷിക്കുന്ന ചാറ്റ്ജിപിടിയുടെ മെമ്മറി ഫീച്ചർ ഉപയോഗിച്ചാണ് വ്യക്തിഗത സ്വഭാവം പ്രതിഫലിപ്പിക്കുന്ന കാരിക്കേച്ചറുകൾ ചാറ്റ്ജിപിടി സൃഷ്ടിക്കുന്നത്. ഇതിനുള്ള പ്രോംപ്റ്റ് എന്താണെന്നും നോക്കാം.
എന്താണ് ചാറ്റ്ജിപിടി കാരിക്കേച്ചർ ട്രെൻഡ്?
ഒരു വ്യക്തിയുടെ തൊഴിൽ, ദിനചര്യ, ശീലങ്ങൾ, വ്യക്തിത്വം വരെ പ്രതിഫലിപ്പിക്കുന്ന തരത്തിലാണ് ചാറ്റ്ജിപിടി എഐ കാരിക്കേച്ചര് ചിത്രങ്ങള് നിര്മ്മിക്കുന്നത്. ഒരു മാധ്യമപ്രവർത്തകൻ നോട്ട്ബുക്കും കാപ്പിയും കൈയിൽ പിടിച്ച നിലയിലും ഒരു ഡിസൈനർ സ്കെച്ചുകളോടുകൂടിയും ഒരു ടെക്നോളജി വിദഗ്ധൻ ലാപ്ടോപ്പുകൾ നിറഞ്ഞ പശ്ചാത്തലത്തോടുകൂടിയും കാരിക്കേച്ചറായി പ്രത്യക്ഷപ്പെടുന്നത് ഇതിന് ഉദാഹരണമാണ്. ഈ ഫീച്ചറുകളാണ് കാരിക്കേച്ചര് ട്രെൻഡിനെ കൂടുതൽ ആകർഷകവും വ്യക്തിപരവുമാക്കുന്നത്.
ചാറ്റ്ജിപിടി കാരിക്കേച്ചർ ട്രെൻഡ് എങ്ങനെ പ്രവർത്തിക്കുന്നു എന്നത് വളരെ ലളിതമാണ്. ഉപയോക്താക്കൾ സ്വന്തം ഫോട്ടോ അപ്ലോഡ് ചെയ്ത്, തങ്ങൾക്ക് ആവശ്യമുള്ള കാരിക്കേച്ചർ സ്റ്റൈൽ എന്താണെന്ന് വ്യക്തമായൊരു പ്രോംപ്റ്റ് നൽകുന്നു. മുഖത്തിന്റെ ആകൃതി, വൈകാരികത, അനുപാതങ്ങൾ തുടങ്ങിയ അടിസ്ഥാന ഘടകങ്ങൾ എഐ വിശകലനം ചെയ്ത്, അല്പം അതിശയോക്തിയോടെ എന്നാൽ തിരിച്ചറിയാവുന്ന തരത്തിൽ ഒരു ചിത്രം ചാറ്റ്ജിപിടി ഒരുക്കുന്നു. ഉപയോക്താവിന്റെ മുൻ സംഭാഷണങ്ങളിൽ നിന്ന് ലഭ്യമായ വിവരങ്ങൾ, അതായത് ജോലി, ഹോബികൾ, ശീലങ്ങൾ തുടങ്ങിയവ ഉപയോഗിച്ചാണ് എഐ വ്യക്തിഗത സവിശേഷതകളോടെ ചിത്രം തയ്യാറാക്കുന്നത്. പലപ്പോഴും അപ്രതീക്ഷിതവും തമാശ നിറഞ്ഞതുമായ ചിത്രങ്ങളാണ് പലർക്കും ലഭിക്കുന്നത്.
ഈ ട്രെൻഡ് വേഗത്തിൽ പ്രചരിക്കാൻ പ്രധാന കാരണം അതിന്റെ ലാളിത്യം തന്നെ. ഈ കാരിക്കേച്ചറുകൾ സൃഷ്ടിക്കാൻ നിങ്ങൾക്ക് ചിത്രരചനാ വൈദഗ്ധ്യമോ, ഡിസൈൻ സോഫ്റ്റ്വെയറോ, എഡിറ്റിംഗ് പരിചയമോ ഒന്നും ആവശ്യമില്ല. നിങ്ങൾക്ക് വേണ്ടത് ഒരു ഫോട്ടോയും ചാറ്റ്ജിപിടിക്ക് നല്കാന് വ്യക്തമായ ഒരു പ്രോംപ്റ്റും മാത്രമാണ്. നിമിഷങ്ങൾക്കുള്ളിൽ ഫലം ലഭിക്കുന്നതിനാൽ പലരും ഇത് വാട്സ്ആപ്പ്, എക്സ്, ഇൻസ്റ്റഗ്രാം തുടങ്ങിയ പ്ലാറ്റ്ഫോമുകളിൽ പ്രൊഫൈൽ ചിത്രമായി ഉപയോഗിക്കാൻ തുടങ്ങി. ഇതോടെ ട്രെൻഡ് കൂടുതൽ ആളുകളിലേക്കെത്തി.
പശ്ചാത്തലം, നിറങ്ങൾ, ഭാവം, ഉപയോഗിക്കുന്ന വസ്തുക്കൾ തുടങ്ങിയ ചെറുവിവരങ്ങൾ വരെ പ്രോംപ്റ്റിൽ ഉൾപ്പെടുത്തുമ്പോൾ, ലഭിക്കുന്ന കാരിക്കേച്ചർ കൂടുതൽ വ്യക്തിപരവും മനോഹരവുമാകുന്നു എന്നാണ് ഉപയോക്താക്കളുടെ അഭിപ്രായം. സാങ്കേതികവിദ്യയും സൃഷ്ടിപരതയും കൂടിച്ചേരുന്ന ഈ പുതിയ ട്രെൻഡ്, ഡിജിറ്റൽ ലോകത്ത് സ്വയം അവതരിപ്പിക്കുന്ന രീതിയെ തന്നെ മാറ്റിമറിക്കുകയാണ്.
എങ്ങനെ നിങ്ങളുടെ കാരിക്കേച്ചർ സൃഷ്ടിക്കാം?
കാരിക്കേച്ചർ തയ്യാറാക്കാൻ ആദ്യം ചാറ്റ്ജിപിടി ആപ്പ് അല്ലെങ്കിൽ വെബ്സൈറ്റ് തുറക്കണം. സൗജന്യ പതിപ്പിൽ ചിലപ്പോൾ ഇമേജ് ജനറേഷനായി കുറച്ച് നേരം കാത്തിരിക്കേണ്ടി വന്നേക്കാം. ഒരു ദിവസം സൃഷ്ടിക്കാവുന്ന കാരിക്കേച്ചര് ഇമേജുകള്ക്ക് നിയന്ത്രണവുമുണ്ട്. പുതിയ ചാറ്റിൽ “Create a caricature of me and my job based on everything you know about me” എന്ന പ്രോംപ്റ്റ് നൽകുന്നതോടെ പ്രക്രിയ ആരംഭിക്കും. മുഖസവിശേഷതകൾ കൃത്യമായി ലഭിക്കുന്നതിനായി ഉപയോക്താവിന്റെ ഒരു വ്യക്തമായ ഫോട്ടോ അപ്ലോഡ് ചെയ്യാൻ ചാറ്റ്ജിപിടി ആവശ്യപ്പെടും. കണ്ണട, താടി, മുടിനിറം തുടങ്ങിയ വിശദാംശങ്ങൾ ചിത്രത്തിൽ ഉൾപ്പെടുത്താൻ ഇത് സഹായിക്കും.
ചാറ്റ്ജിപിടിയുടെ മെമ്മറി സംവിധാനമാണ് ഈ ട്രെൻഡിന്റെ അടിസ്ഥാനം. മുൻ സംഭാഷണങ്ങളിൽ നിന്നുള്ള വിവരങ്ങൾ സൂക്ഷിച്ച് വ്യക്തിഗത അനുഭവം നൽകുന്ന ഈ സവിശേഷത കാരിക്കേച്ചറുകളെ കൂടുതൽ യാഥാർഥ്യത്തോട് ചേർത്തുനിർത്തുന്നു. ഉദാഹരണത്തിന്, കോഫിയോടുള്ള ഇഷ്ടമോ യാത്രാപ്രിയതയോ ചിത്രത്തിൽ പ്രതിഫലിക്കാം. ഇതിനുപുറമേ, “ഇൻസൈഡ് മൈ ബ്രെയിൻ”, “ഫ്യൂച്ചർപ്രെഡിക്റ്റർ”, “സ്പിരിറ്റ് അനിമൽ” തുടങ്ങിയ വ്യത്യസ്ത പ്രോംപ്റ്റുകൾ ഉപയോഗിച്ച് കൂടുതൽ സൃഷ്ടിപരമായ എഐ ചിത്രങ്ങളും പരീക്ഷിക്കാം.
