ബർലിൻ: മെയിൻസ് രൂപതയുടെ സഹായ മെത്രാനായി ഫാ. ജോഷി ജോർജ് പൊട്ടക്കൽ (48)നെ ലിയോ പതിനാലാമൻ മാർപാപ്പ നിയമിച്ചു. കർമ്മലീത്ത പുരോഹിതനായ ഫാ. ജോഷി യൂറോപ്പിന് പുറത്ത് ജനിച്ച ജർമൻ രൂപതയിൽ സഹായ മെത്രാനാകുന്ന ആദ്യ വൈദികനാണ്. 2004 മുതൽ ഫാ. ജോഷി ജോർജ് പൊട്ടക്കൽ മെയിൻസിൽ സേവനമനുഷ്ഠിക്കുന്നു. രൂപതയിൽ നഗര യുവജന ചാപ്ലെയിൻ, ഇടവക വികാരി തുടങ്ങിയ പദവികൾ വഹിച്ചിട്ടുണ്ട്. നിലവിൽ രൂപത ക്യൂറിയയിലെ പുരോഹിതരിൽ സ്പെഷ്യലൈസ് ചെയ്ത പേഴ്സണൽ ഡയറക്ടറാണ്. 2026 മാർച്ച് 15നാണ് മെത്രാഭിഷേകം.
വടക്കൻ ആഫ്രിക്കയിലെ റോമൻ പ്രവിശ്യയായ നുമിഡിയയിലെ സെറാമുസ്സയുടെ സ്ഥാനിക മെത്രാനായും പൊട്ടക്കൽ നിയമിക്കപ്പെടും. മെയിൻസിൽ, മതപരമായ ക്രമങ്ങൾക്കായുള്ള എപ്പിസ്കോപ്പൽ വികാരിയായി അദ്ദേഹം സേവനമനുഷ്ഠിക്കും. ഇന്ത്യൻ വംശജനാണെങ്കിലും നിലവിൽ ജോഷി ജോർജ് പൊട്ടക്കലിന് ജർമൻ പൗരത്വമാണുള്ളത്.
മെയിൻസ് രൂപതയുടെ വികാരി ജനറാളായി സേവനം ചെയ്യുന്നതിനിടെയാണ് പുതിയ നിയമനം. മീങ്കുന്നം പൊട്ടയ്ക്കൽ പരേതരായ ജോർജിന്റെയും ഏലിയാമ്മയുടെയും രണ്ടാമത്തെ മകനാണ്. ജ്യേഷ്ഠസഹോദരൻ ഫാ. ജോയ്സ് പൊട്ടയ്ക്കലും കർമ്മലീത്ത സന്യാസ സമൂഹത്തിലെ അംഗമാണ്. അദ്ദേഹം നിലവിൽ കാനഡയിൽ സേവനം ചെയ്യുകയാണ്. മൂവാറ്റുപുഴ നിർമല കോളജിലെ അസി. പ്രൊഫസർ ജോബിയാണ് മറ്റൊരു സഹോദരൻ. നിയമനത്തെ അദ്ഭുതത്തോടെയാണ് നോക്കിക്കാണുന്നത് എന്ന് നിയുക്ത മെത്രാൻ പറഞ്ഞു.
കോതമംഗലം രൂപതാംഗവും തൃശൂർ ചേറ്റുപുഴ സെന്റ് തോമസ് പ്രവിശ്യാ അംഗവുമാണ് ഫാ. ജോഷി. എറണാകുളം ജില്ലയിലെ ആരക്കുഴ പഞ്ചായത്തിലെ മീൻകുന്നമാണ് സ്വദേശം. ജർമൻ ബിഷപ്സ് കോൺഫറൻസിലെ മൂന്നാമത്തെ വിദേശ വംശജനായ ബിഷപ്പാണ് 1977ൽ ജനിച്ച ഫാ. ജോഷി ജോർജ് പൊട്ടക്കൽ.
1996ൽ കർമ്മലീത്ത സഭയിലൂടെ ശുശ്രൂഷാജീവിതം ആരംഭിച്ച ഫാ.ജോഷി 2003ൽ പുരോഹിതനായി അഭിഷിക്തനായി. 2004 മുതൽ ജർമനിയിൽ, മ്യുൻസ്റററിലെ മത പുരോഹിതർക്കായുള്ള ഭാഷാ സ്കൂളിലും പാസ്റ്ററൽ സെമിനാരിയിലും പഠിച്ച അദ്ദേഹം, 2006ൽ മെയിൻസിൽ സിറ്റി യൂത്ത് ചാപ്ലിനായി സേവനമനുഷ്ഠിച്ചു.
2009ൽ, ഇടവക വികാരിയും പിന്നീട് ഡപ്യൂട്ടി ഡീനും തുടർന്ന് ബെർഗ്സ്ട്രേസ്–ഓസ്റ്റ് ഡീനറിയുടെ ആക്ടിങ് ഡീനുമായി. 2016 മുതൽ, ജർമനിയിൽ താമസിക്കുന്ന കർമ്മലീത്ത സന്യാസ സമൂഹത്തിന്റെ പ്രവിശ്യയിലെ അംഗങ്ങളുടെ റീജനൽ സുപ്പീരിയറാണ്. 2022 മുതൽ, രൂപത ക്യൂറിയയിൽ പേഴ്സണൽ ഓഫിസറാണ്. പുതിയ ആൾ ചുമതല ഏറ്റെടുക്കുന്നത് വരെ ഫാ. ജോഷി ഈ പദവിയിൽ തുടരും.
പാഡർബോണിലെ ആർച്ച് ബിഷപ്പായി ഉഡോ മാർക്കസ് ബെന്റ്സിനെ നിയമിച്ചതിനെത്തുടർന്ന്, 2024 മാർച്ച് മുതൽ മെയിൻസ് രൂപതയ്ക്ക് സഹായ മെത്രാൻ ഇല്ലായിരുന്നു. 2023 അവസാനത്തോടെ നിയമനം ലഭിച്ച ബിഷപ് കോൾഗ്രാഫ് മാർപാപ്പയോട് പുതിയ സഹായ മെത്രാനെ വേണമെന്ന് അഭ്യർഥിച്ചു. കോൾഗ്രാഫ് നിർദ്ദേശിച്ച മൂന്ന് പേരുടെ ചുരുക്കപ്പട്ടികയിൽ നിന്നാണ് വത്തിക്കാൻ ഫാ. ജോഷി ജോർജ് പൊട്ടക്കലിനെ തിരഞ്ഞെടുത്തത്.
ഫാ. ജോഷി ജോർജ് പൊട്ടക്കലിന്റെ നിയമനത്തോടെ, ജർമൻ ബിഷപ്സ് കോൺഫറൻസിൽ ഇപ്പോൾ ജർമനിക്ക് പുറത്ത് ജനിച്ച മൂന്ന് അംഗങ്ങൾ ഉണ്ടാകും. മ്യൂണിക്കിലെ സഹായ ബിഷപ് റൂപർട്ട് ഗ്രാഫ് സു സ്റ്റോൾബർഗ് സാൽസ്ബുർഗിലാണ് ജനിച്ചത്. യുക്രെയ്നിയൻ ഗ്രീക്ക് കത്തോലിക്കരുടെ അപ്പസ്തോലിക് എക്സാർക്കായ ബിഷപ് ബോഹ്ദാൻ ഡിസുറാഖ്, ജർമൻ ബിഷപ്സ് കോൺഫറൻസിന്റെ ഉപദേശക അംഗമാണ്, യുക്രെയ്നിലാണ് അദ്ദേഹം ജനിച്ചത്.
ഏകദേശം 600,000 കത്തോലിക്കരുള്ള മെയിൻസ് രൂപത ജർമനിയിലെ ഏറ്റവും പഴക്കമേറിയതും പരമ്പരാഗതവുമായ രൂപതകളിൽ ഒന്നാണ്.
